လန်ဒန်မြို့ခံကလပ်အသင်း (၃)သင်းဖြစ်သည့် ချယ်လ်ဆီး၊ စပါးနှင့် အာဆင်နယ်အသင်းတို့သည် နှစ်စဉ်ရာသီကြိုကာလတိုင်း၌ လန်ဒန်ဘုရင်ရွေးပွဲဟု တင်စားခံနေရသည့် (၃)သင်းပတ်လည် ရန်ပုံငွေပြိုင်ပွဲတစ်ခုကို ယှဉ်ပြိုင်ကစားရန်စီစဉ်နေကြောင်း သိရှိရသည်။
ယင်း (၃)သင်းစလုံးသည် ဥရောပစူပါလိဂ်ပြိုင်ပွဲကို ထူထောင်ရန် ကြိုးပမ်းခဲ့ကြသည့်အသင်းများဖြစ်ပြီး ကျဆင်းနေသည့် အသင်းပုံရိပ်များကို ပြန်လည်မြှင့်တင်ရန်အတွက် ယင်းပြိုင်ပွဲကို စီစဉ်နေခြင်းဖြစ်ကာ ရရှိသည့်ဝင်ငွေများကို လူမှုရေးရန်ပုံငွေများအဖြစ် အသုံးပြုသွားမည်ဖြစ်ကြောင်း သိရှိရသည်။
ယခုအချိန်တွင် ဆွေးနွေးမှုများကို စတင်ပြုလုပ်နေပြီဖြစ်ပြီး အစောပိုင်းအဆင့်များသာ ရှိနေသေးသော်လည်း အမှန်တကယ်ဖြစ်လာရန် (၃)သင်းစလုံးက ယုံကြည်မှုမြင့်မားနေသည်ဟုလည်း မီဒီယာများက ဖော်ပြလျက်ရှိသည်။
ချယ်လ်ဆီး၊ စပါးနှင့် အာဆင်နယ်အသင်းတာဝန်ရှိသူများသည် လွန်ခဲ့သည့် (၃)ပတ်က အသင်းကိုအားပေးသည့် ပရိသတ်များနှင့် ထိပ်တိုက်တွေ့ခဲ့သည့် ယင်းလုပ်ရပ်ကို ဖာထေးရန်အတွက် Big 3 ဟု လောလောဆယ် အမည်ပေးထားသည့်ပြိုင်ပွဲကို စီစဉ်နေရာတွင် အသေးစိတ်ထုတ်ပြန်ကြေညာခြင်းမရှိသေးသော်လည်း ယူရိုဗိုလ်လုပွဲကျင်းပမည့် ဇူလိုင်လ (၁၄)ရက်နေ့နှင့် ပရီးမီးယားလိဂ်ရာသီသစ် မစတင်မီကာလအကြားတွင် ကျင်းပသွားမည်ဖြစ်ပြီး နှစ်စဉ်ကျင်းပသွားရန်အတွက်မူ ဖြစ်နိုင်ခြေနည်းပါးကြောင်းလည်း သိရှိရသည်။
ပုံမှန်အားဖြင့် ယင်းအသင်းများသည် ရာသီကြိုကာလများတွင် အာရှနှင့် အမေရိကတို့တွင် ခြေစမ်းပွဲများ လှည့်လည်ကစားခြင်းဖြင့် စပွန်ဆာဝင်ငွေများရရှိခြင်းကြောင့် နှစ်စဉ်ကျင်းပမည်ဆိုပါက ယင်းရာသီကြိုခြေစမ်းပွဲများကို စီစဉ်ရန် အခက်အခဲရှိနေရာ လာမည့်ရာသီ တစ်ခုအတွက်သာ ဖြစ်နိုင်ဖွယ်ရှိနေခြင်းဖြစ်သည်။
ယင်းခြေစမ်းပွဲများသည် လာမည့်ရာသီတွင် ပရိသတ်များ ကွင်းအတွင်းသို့ ပုံမှန်အတိုင်း ဝင်ရောက်ကြည့်ရှုရေးအတွက် စမ်းသပ်သည့် ပွဲများလည်းဖြစ်သလို၊ ရုပ်သံကုမ္ပဏီများကို ဆွဲဆောင်နိုင်မှုအပေါ် မူတည်ပြီး ပုံမှန်ကစားသွားမည့်ပြိုင်ပွဲတစ်ရပ်လည်း ဖြစ်လာနိုင်ဖွယ်ရှိသည်ဟု သိရှိရသည်။
