ပြီးခဲ့တဲ့ ကြားရက်က ချန်ပီယံလိဂ်မှာ ရီးရဲယ်မက်ဒရစ်ကို လီဗာပူးတို့ အိမ်ကွင်းမှာ အရှက်တကွဲ ရှုံးနိမ့်ခဲ့ပြီးနောက် ဂျေမီကာရေဂါဟာ ဗာဂျယ်ဗန်ဒိုက်ကို အဓိက ပစ်မှတ်ထား ဝေဖန်မှု လုပ်သွားခဲ့ပြီး မနေ့က သတင်းစာရှင်းလင်းပွဲမှာတော့ ယာဂန်ကလော့ဟာ နယ်သာလန် နောက်ခံလူရဲ့ poor form နဲ့ပက်သက်ပြီး ကာကွယ်ပြောဆိုမှု လုပ်သွားခဲ့ပါတယ်။ ဗန်ဒိုက်ဟာ မကြာသေးခင်ကမှ ဒူးကောက်ကြောဒဏ်ရာ ကနေ ပြန်လာခဲ့သူ ဖြစ်ပြီး ကြားရက်က လီဗာပူးတို့ အန်ဖီးမှာ ရီးရဲယ်မက်ဒရစ်ကို ၅-၂ နဲ့ ရှုံးနိမ့်ခဲ့တဲ့ပွဲစဉ်မှာ အခြား လီဗာပူး အသင်းဖော်တွေလိုပဲ ခက်ခဲတဲ့ညနဲ့ ရင်ဆိုင်ခဲ့ရပါတယ်။
ဗန်ဒိုက်ဟာ အခြား လီဗာပူး ကစားသမား တော်တော်များများလိုပဲ ဒီရာသီမှာ ရုန်းကန်နေခဲ့ရပြီး အဆိုပါ ချန်ပီယံလိဂ် ပွဲစဉ်အပြီးမှာ ကာရေဂါက အသင်းရဲ့ အဓိက ဒေါက်တိုင် ကစားသမားဟာ အခုဆိုရင် လီဗာပူး ခံစစ်ပိုင်း ပြိုကွဲနေမှုရဲ့ အရင်းအမြစ် ဖြစ်နေပြီလို့ ဝေဖန်ခဲ့ပါတယ်။ ဗန်ဒိုက် ကိုယ်တိုင်ကလည်း ပြီးခဲ့တဲ့ ရက်သတ္တပတ်တွေအတွင်း လီဗာပူးအသင်းရဲ့ performance ဟာ လုံလောက်တဲ့ အနေအထားမှာ ရှိမနေဘူးလို့ ဝန်ခံသွားခဲ့ပေမယ့် ကစားသမားတွေကို စက်ရုပ်တွေလို မဆက်ဆံသင့်ဘူးလို့ ဆိုလိုက်ပါတယ် ။
ဗန်ဒိုက်က “ရှုံးနိမ့်တာကတော့ ဘယ်တော့မှ မကောင်းပါဘူး။ အထူးသဖြင့် ရီးရဲယ်မက်ဒရစ်ကို ကျနော်တို့ ရှုံးနိမ့်ခဲ့တဲ့ပုံစံပေါ့။ ကျနော်တို့ဟာ မက်ဒရစ်မှာ ဘာအခွင့်အရေးမှ မရှိသလောက် အနေအထားမျိုး ဖြစ်သွားတာကတော့ ခက်ခဲလှပါတယ်။ ကျနော်တို့ ရင်ဆိုင်ကစားခဲ့တဲ့ ရီးရဲယ်မက်ဒရစ်ဟာ လက်ရှိချန်ပီယံပါ။ တစ်သင်းလုံးမှာ အရည်အသွေးမြင့် ကစားသမားတွေက အပြည့် ဖြစ်ပြီး ကိုယ်အမှား လုပ်တာနဲ့ သူတို့က အပြစ်ပေးသွားမှာပါ။
အမှားတွေက ဖြစ်တက်ပါတယ်။ ကျနော်တို့ဟာ စက်ရုပ်တွေ မဟုတ်ပါဘူး။ ကံမကောင်းစွာနဲ့ ဒီလို ဖြစ်နေပါတယ်။ တစ်ဦးတည်းသော လုပ်နိုင်တဲ့အရာက အမှားတွေကနေ သင်ခန်းစာယူကာ နောက်တစ်ကြိမ် ဒီလို ထပ်မဖြစ်အောင် လုပ်သွားဖို့ ဖြစ်ပါတယ်။” လို့ ပြောခဲ့ပါတယ်။
ကလော့ဟာ ယနေ့ည ခရစ်စတယ်ပဲလေ့စ်နဲ့ ပွဲစဉ်မှာ လူအပြောင်းအလဲတွေ ပြုလုပ်သွားမယ်လို့ ဆိုလိုက်ပြီး ဝေဖန်မှုတွေ ကြုံတွေ့နေရတဲ့ ဗန်ဒိုက် ဘက်ကနေ ကာကွယ်ပြောဆိုမှု လုပ်သွားခဲ့ပါတယ်။
ကလော့က “ကောင်လေးတွေ အကောင်းဆုံး အနေအထားမှာ ရှိမနေဘူးဆိုတာ ကျနော်တို့ မြင်နိုင်ပါတယ်။ မက်ဒရစ်နဲ့ ပွဲစဉ်မှာ အနည်းငယ် ထိခိုက်မှုလေးတွေ ရှိခဲ့တာကြောင့် ပဲလေ့စ်နဲ့ပွဲမှာ သူတို့ အားလုံး ပြန်ကစားနိုင်ဖို့ မသေချာပါဘူး။ ကျနော်တို့ အပြောင်းအလဲတွေ လုပ်သွားချင်ပါတယ်။ အပြောင်းအလဲတွေ လုပ်သွားမှာပါ။ ဒါပေမယ့်လည်း ကာလရှည်ဒဏ်ရာ ကနေ ပြန်လာခဲ့တဲ့ သူတွေကတော့ အချိန်ယူပြီး ပြင်ဆင်မှု လုပ်သွားရမှာပါ။ ဖာမီနို ဂျိုတာ နဲ့ ဗန်ဒိုက် တို့ဟာ ဒီလိုမျိုး အခြေအနေမှာ ရှိနေကြပါတယ်။
လူတိုင်းက ဗန်ဒိုက်ကို စက်ရုံတစ်ရုပ်လို ယူဆနေကြပါတယ်။ ဒါပေမယ့် သူဟာ ပြီးခဲ့တဲ့ရာသီက ပွဲအများဆုံး ကစားခဲ့တဲ့ ကစားသမားတစ်ဦး ဖြစ်ပါတယ်။ ပြီးခဲ့တဲ့ ကမ္ဘာ့ဖလား ပြိုင်ပွဲတုန်းကလည်း နယ်သာလန် အတွက် ပွဲတိုင်း ပါဝင် ကစားခဲ့ပါတယ်။ အဲဒီနောက် ကလပ်ကို ပြန်လာချိန်မှာ ကျနော်တို့ အတွက် ပထမစက္ကန့် ကတည်းက ဝင်ကစားခဲ့ရပါတယ်။ ဒီလို ပွဲများစွာ ကစားခဲ့တဲ့ အကျိုးဆက် အဖြစ် ဒဏ်ရာရရှိသွားခဲ့ပါတယ်။ ပြန်လာချိန်မှာလည်း တချိန်လုံး ကစားနေရပါတယ်။ ဒါဟာ သူ့ရဲ့ အခြေအနေပါ။” လို့ပြောသွားပါတယ်။
ဆက်လက်ပြီး ကလော့က ကိုနာတေးဟာ လီဗာပူး အတွက် ပြန်ကစားပေးနိုင်ရန် နီးစပ်နေပြီလို့ ဆိုလိုက်ပါတယ် ။ ပြင်သစ်နောက်ခံလူဟာ လွန်ခဲ့တဲ့ ၄ ပတ်လောက် ကတည်းက ဒူးကောက်ကြောဒဏ်ရာကြောင့် နားနေခဲ့ရသူ ဖြစ်ပြီး လက်ရှိအချိန်မှာတော့ အသင်းနဲ့အတူ လေ့ကျင့်ခန်း ပြန်ဆင်းနေပါတယ်။
ကလော့က “အီဘူဟာ ပြန်ကစားနိုင်ရန် နီးစပ်နေပါပြီ။ ဒါပေမယ့် သူဟာ ဒဏ်ရာ အကြာကြီး ရခဲ့ပြီးနောက် အသင်းနဲ့အတူ လေ့ကျင့်ခန်း ပြန်ဆင်းတာ ၂ ကြိမ်ပဲ ရှိနေပါသေးတယ်။”
