နာမည်ကျော် ၀ါရင့်တိုက်စစ်မှူးနှစ်ဦးဖြစ်သည့် ဒီယေဂိုကော်စတာ နှင့် ဟော့ခ်တို့သည် ၎င်းတို့၏ ကလပ်အသင်းဖြစ်သည့် အက်သလက်တီကိုမင်နဲရိုးအသင်းကို တစ်ရာသီအတွင်း တတိယမြောက်ဖလား အရယူပေးရန် ဆန္ဒပြင်းပြနေကြကြောင်း သိရှိရသည်။
အက်သလက်တီကိုမင်နဲရိုးအသင်းသည် ယခုရာသီတွင် ဘရာဇီးလ်စီးရီးအေ အောင်မြင်မှုအပါအဝင် ဆုဖလားနှစ်လုံး ဆွတ်ခူးထားပြီး စီးရီးအေအောင်မြင်မှုမှာ နှစ်ပေါင်း (၅၀) အကြာတွင် ပြန်လည်ရယူနိုင်ခြင်းဖြစ်သည်။
ဒီယေဂိုကော်စတာနှင့် ဟော့ခ်တို့သည် ယခုရာသီတစ်လျှောက်လုံး အသင်း၏ တိုက်စစ်ပိုင်းတွင် အကောင်းဆုံးပုံစံပြသနိုင်ခဲ့ကြပြီး ယခုအချိန်တွင်လည်း ဘရာဇီးလ်ဖလားပွဲ Copa do Brazil ပြိုင်ပွဲတွင် ဗိုလ်လုပွဲအဆင့်သို့ ပို့ဆောင်ထားပြီးဖြစ်သည်။
ဗိုလ်လုပွဲတွင် အက်သလက်တီကိုပါရာနန့်စ်အသင်းနှင့် ယှဉ်ပြိုင်ရမည်ဖြစ်ပြီး အသင်းအတွက် အောင်မြင်မှုယူပေးရန် မိမိတို့နှစ်ဦးစလုံးက ဆန္ဒပြင်းပြနေကြသည်ဟု ဒီယေဂိုကော်စတာက ပြောကြားခဲ့သည်။
