အဲဗာတန်အသင်း၏ နည်းပြသစ် ဘင်နီတက်ဇ်က အောင်မြင်မှုရယူနိုင်ခဲ့ပါက မိမိအား ဝေဖန်နေသည့် အဲဗာတန်ပရိသတ်များကို အနိုင်ရရှိလိမ့်မည်ဟု ပြောကြားခဲ့သည်။
ဘင်နီတက်ဇ်သည် အဲဗာတန်အသင်း၏ မြို့ခံပြိုင်ဘက် လီဗာပူးလ်အသင်းကို ကိုင်တွယ်ခဲ့ဖူးသူဖြစ်သောကြောင့် ၎င်းအား နည်းပြသစ်အဖြစ် ခန့်အပ်ခြင်းကို အဲဗာတန်ပရိသတ်အများစုက လိုလားခြင်းမရှိကြပေ။
ထို့ ပြင် ဘင်နီတက်ဇ်သည် လီဗာပူးလ်အသင်းကို ကိုင်တွယ်စဉ်က အဲဗာတန်အသင်းကို အသင်းငယ်လေးဟု မှတ်ချက်ပေးခဲ့ဖူးခြင်းကြောင့်လည်း အဲဗာတန်ပရိသတ်များက အမျက်မပြေသေးဘဲ ဖြစ်နေခဲ့သည်။
ပရိသတ်အချို့က ဘင်နီတက်ဇ် အဲဗာတန်နည်းပြအဖြစ် ခန့်အပ်ခံရပြီးနောက်တွင် အသက်အန္တရာယ်ခြိမ်းခြောက်မှုများပင် ပြုလုပ်ခဲ့ကြောင်း သိရသည်။
သို့သော် ဘင်နီတက်ဇ်က အရေးအကြီးဆုံးမှာ လက်ရှိအသင်းအတွက် တိုက်ပွဲဝင်ရန်သာဖြစ်သည်ဟု ဆိုခဲ့သည်။
ဘင်နီတက်ဇ်က ”ကျွန်တော် အဲဗာတန်အသင်းအတွက် တိုက်ပွဲဝင်သွားမှာပါ။ ပွဲတိုင်းမှာ အကောင်းဆုံးဖြစ်အောင် ကြိုးစားသွားမှာပါ။ ပြိုင်ဘက်တိုင်းကို ယှဉ်ပြိုင်နိုင်အောင် ကြိုးစားသွားမှာပါ။ ပြီးခဲ့တဲ့ရာသီက ရပ်တည်မှုထက် ပိုကောင်းအောင်လည်း ကြိုးစားသွားမှာပါ။ ကျွန်တော် ပျော်ရွှင်ရရင် ပရိသတ်တွေ ပိုပြီးပျော်ရွှင်ရမှာပါ။ အားလုံး ပျော်ရွှင်ရဖို့ မျှော်လင့်ပါတယ်။ အောင်မြင်မှုက ဝေဖန်နေသူတွေကို အနိုင်ယူနိုင်ပါလိမ့်မယ်”ဟု ပြောကြားခဲ့သည်။
