ပရီးမီးယားလိဂ်အဖွဲ့ချုပ်က ပရီးမီးယားလိဂ်တွင် တစ်ပတ်အတွင်း ကိုဗစ်ရောဂါပိုးကူးစက်ခံရသူ (၄၂)ဦးအထိရှိကြောင်း ပြီးခဲ့သည့် တနင်္လာနေ့က ကြေညာခဲ့ပြီးနောက် ဝက်စ်ဟမ်းအသင်းနည်းပြ ဒေးဗစ်မွိုက်စ်က ပရီးမီးယားလိဂ်ပွဲစဉ်ဇယားရေးဆွဲမှုအား ပြစ်တင်ဝေဖန်လိုက်သည်။
ဒေးဗစ်မွိုက်စ်က ဒီဇင်ဘာလအတွင်း ပရီးမီးယားလိဂ်ပွဲစဉ်များကို အလွန်များပြားအောင် ရေးဆွဲထားခြင်းမှာ ပရီးမီးယားလိဂ်တွင် ကိုဗစ်ရောဂါပိုးကူးစက်မှု ပိုမိုဆိုးရွားစေရန် တွန်းအားပေးသကဲ့သို့ ဖြစ်စေကြောင်း ဝေဖန်ပြောကြားခဲ့သည်။
ဒေးဗစ်မွိုက်စ်၏ ဝက်စ်ဟမ်းအသင်းမှာ လက်ရှိအချိန် (ဒီဇင်ဘာ ၁၅ ရက်)အထိ ကိုဗစ်ရောဂါပိုးကူးစက်ခံရသည့်အသင်းများစာရင်းတွင် မပါဝင်သေးသော်လည်း ၎င်းက ယခုလအတွင်း ပွဲများ အလွန်များပြားခြင်းအတွက် ဝေဖန်ခဲ့ခြင်းဖြစ်သည်။
ဝက်စ်ဟမ်းအသင်းသည် ဒီဇင်ဘာလအတွင်း ပြိုင်ပွဲစုံ ပွဲပေါင်း (၉)ပွဲအထိ ကစားရမည်ဖြစ်ကြောင်း သိရသည်။
”ကစားသမားတွေဟာ ပွဲတွေများတော့ ပြန်အနားယူချိန်နည်းပါးပြီး ဒါက ကိုရိုနာဗိုင်းရပ်စ်ရောဂါပိုး ကူးစက်ခံရဖို့ ပိုပြီးဖြစ်နိုင်ခြေများပါတယ်”ဟု မွိုက်စ်က ဆိုခဲ့သည်။
