အီတလီလက်ရွေးစင်အသင်း၏နည်းပြ မန်စီနီက ယူရို-၂၀၂၀ ပြိုင်ပွဲ၏ ဆီမီးဖိုင်နယ်တွင် ဆုံတွေ့ရမည့် စပိန်အသင်းကို အနိုင်ရရှိရန် ထူးခြားသည့်စွမ်းဆောင်ရည် လိုအပ်သည်ဟု ပွဲကြိုသတင်းစာရှင်းလင်းပွဲတွင် သုံးသပ်ပြောကြားခဲ့သည်။
အီတလီအသင်းသည် ယူရို-၂၀၂၀ ပြိုင်ပွဲ ၌ ပွဲတိုင်းအနိုင်ရရှိအောင် စွမ်းဆောင်ထားသည့်အသင်းဖြစ်ပြီး စပိန်အသင်းမှာမူ အုပ်စုတွင်း၌ နိုင်ပွဲ(၁)ပွဲသာ ရရှိခဲ့သလို၊ ရှုံးထွက်အဆင့်များတွင်လည်း ပုံမှန်ပွဲကစားချိန်မိနစ်(၉၀)အတွင်း အနိုင်မရရှိခဲ့ပေ။
ထို့ကြောင့် နှစ်သင်းဆုံတွေ့ရမည့် ဆီမီးဖိုင်နယ်ပွဲစဉ်၌ အီတလီအသင်းက အနိုင်ရရှိရန် ပိုမိုရေပန်းစားနေသော်လည်း မန်စီနီက ယခုအဆင့်တွင် မည်သည့်အသင်းမျှ လွယ်ကူမည်မဟုတ်ကြောင်းလည်း ပြောကြားခဲ့သည်။
မန်စီနီက ”ဒီပွဲက လွယ်ကူမှာ မဟုတ်ပါဘူး။ ကျွန်တော်တို့ ထူးခြားတဲ့စွမ်းဆောင်ရည် လိုအပ်ပါတယ်။ စပိန်က ထိပ်တန်းအသင်းတစ်သင်းပါ။ ဆီမီးဖိုင်နယ်ဖြစ်တာကြောင့်လည်း မလွယ်ကူနိုင်ပါဘူး။ ခက်ခဲတဲ့ပွဲတစ်ပွဲ ဖြစ်မှာပါ။ စပိန်က ဘယ်လ်ဂျီယံနဲ့ ခြားနားပါတယ်။ ဒါပေမဲ့ ကျွန်တော်တို့ အခက်အခဲများစွာနဲ့ ရင်ဆိုင်ရဦးမှာပါ။ ရှုံးထွက်အဆင့်ရဲ့ ပထမဆုံးပွဲမှာကတည်းက သြ စတြီးယားအသင်းရဲ့ နိုင်လိုစိတ်အပြည့်နဲ့ ကစားပုံကြောင့် အခက်တွေ့ခဲ့ရပါတယ်။ စပိန်က ပြီးခဲ့တဲ့နှစ်တွေအတွင်း အသင်းကောင်းတစ်သင်းဖြစ်ကြောင်း ပြသခဲ့သလို၊ လူငယ်ကစားသမားများစွာနဲ့ ထိပ်တန်းနည်းပြလည်း ရှိနေပါတယ်။ လူးဝစ်အင်းနရစ်က ဘာစီလိုနာနဲ့ ချန်ပီယံလိဂ်ဖလား ရယူခဲ့ရုံတင်မဟုတ်ဘဲ ရိုးမားမှာလည်း အစွမ်းပြခဲ့သူပါ”ဟု ပြောကြားခဲ့သည်။
အီတလီအသင်းသည် ယူရိုပြိုင်ပွဲတွင် (၅)ပွဲကစား (၅)ပွဲစလုံး အနိုင်ကစားထားသည့်အသင်းဖြစ်သည်။
အီတလီအသင်းသည် ယူရိုပြိုင်ပွဲ ဆီမီးဖိုင်နယ်အဆင့်သို့ ယခုနှစ်အပါအဝင် (၆)ကြိမ်(၁၉၆၈၊ ၁၉၈၀၊ ၁၉၈၈၊ ၂၀၀၀၊ ၂၀၁၂၊ ၂၀၂၀)အထိ တက်ရောက်နိုင်ခြင်းဖြစ်ကြောင်း သိရသည်။
